Merry X'mas~~ 聖誕節，睇Sammi演唱會ge日子..... 睇演唱會之前，我地先去會展行左個美食展，可能手持免費飛ge人太多，包括我地~~真係多人到嘔，入到去迫多過睇野，唔知為咩~~ 之後，搭船過尖咀食個dinner，就過去紅館等開場； 天后真係天后，舞台機關都特別多，配合燈光，個台真係靚到無人有.... 一開場，已經空降舞台，閃閃生輝.... 成個concert，帶出ge係Sammi ge經歷... 走到癲峰ge Sammi -> 長恨歌ge低潮期 -> 走出陰霾 -> 信奉神 -> 感謝神 -> 一個得到解脫，全新ge鄭秀文站在舞台上繼續發光發亮 一個人能夠走出陰霾，唔係咁容易，雖然我唔係信奉主耶穌，但如果有一種力量可以指引自己向前走，咁未嘗唔係一件好事!! 由頭到尾，雖然Sammi把聲沙沙地，但都仲堅好聽，一把會講故事ge歌聲，係呢個樂壇已經少之又少.... 去到快歌Meldy，前面480蚊位d人已經high到爆，唯獨280蚊位d人仲超冷靜，我真係超high，去到最尾已經忍唔住，自己企左起身，haha~~我都唔知點解我自己會咁做，正到咁，真係好難再繼續坐係度囉~~~ 至於嘉賓，有同Sammi拍百分百感覺ge鄭伊健同葛民輝，好失望，我仲以為有劉德華呀!! 仲有同Sammi合唱聖誕歌ge靚聲皇Hanjin.... 8點9開場，11點已經完場，個個係度起哄嗌Encore，最後，Sammi係有出返黎，但只係講左句：「真係無歌唱喇!!」意思即係叫我地死心返屋企啦!!! 返到屋企，High到訓唔著，今晚真係正爆呀!!有機會都想再睇..... | 
